30 წლის ხაშურელი ფეხბურთელი, გიორგი ლაცაბიძე, შესანიშნავ ფორმაში იმყოფება და თავის გუნდში ერთ-ერთი გამორჩეულია. მესამე ლიგაში მოასპარეზე სართიჭალის „შტურმის“ მარცხენა მცველმა მიმდინარე სეზონში უკვე 13 მატჩი ჩაატარა, სადაც 4 გოლის გატანა და 4 საგოლე გადაცემა მოახერხა – შესანიშნავი მაჩვენებელი ამპლუიდან გამომდინარე.
ლაცაბიძე გულშემატკივარს ხშირად ახსენდება თავისი უნივერსალურობით – წარსულში ხაშურის “ივერიაში” ის ყოველთვის იქ იდგა, სადაც გუნდს სჭირდებოდა, თუმცა ბუნებრივად მარცხენა მცველია. ბევრი მიიჩნევს, რომ ნახევარდაცვაში კიდევ უფრო შედეგიანი იქნებოდა.
სეზონის ერთ-ერთი მნიშვნელოვანი მომენტი გიორგი ლაცაბიძის გოლი იყო ხობის „კოლხეთთან“. სწორედ მისმა ზუსტმა დარტყმამ მოაპოვებინა “შტურმს” მნიშვნელოვანი 3 ქულა გასვლით შეხვედრაში.
გუშინდელ ტურში კი ლაცაბიძემ თავი კიდევ ერთხელ გამოიჩინა – დუბლი შეასრულა „ბორჯომის“ წინააღმდეგ, რითაც დაამტკიცა, რომ ბრწყინვალე ფორმაშია.
ამ დროისთვის სართიჭალის „შტურმი“ მესამე ლიგის სატურნირო ცხრილში პირველ ადგილზეა 32 ქულით და გიორგი ლაცაბიძეს ამ წარმატებაში უდიდესი წვლილი მიუძღვის.
About The Author
